爆相爆片:高空飛叉傷女工

爆相爆片:
高空飛叉傷女工

高空墮物隨時搞出人命,好似噚日朝早8點幾,荔枝角荔欣苑荔林閣就發生一宗高空墮物傷人案。有位59歲姓洪嘅清潔女工做做吓嘢,無端端樓上就跌咗支晾衫用嘅丫叉落嚟,插穿咗個垃圾鏟不特止,仲整傷咗佢個膊頭,結果要送院治理,差啲連命都無。
讀者Lawrence係荔林閣的低層住戶,佢講述事發一刻:「聽到有人大嗌一聲,見到個清潔女工㩒住左膊。」現場可以睇到,女工嘅垃圾鏟俾一支晾衫用嘅丫叉插穿,跌喺地上。支丫叉插得穿個垃圾鏟,睇到都咪話唔驚,個女工真係險過剃頭。
據Lawrence講,受傷嘅女工當時正喺大廈對出清潔緊,估唔到禍從天降。事後保安員報警,多位工友都趕到睇吓女工有冇事,佢哋都議論紛紛話:「成日有嘢跌落嚟。」
警員到場調查,相信丫叉由樓上高處墮下;而女工就送咗去瑪嘉烈醫院治理。不過警方仲調查緊,暫時仲未拉到人。

丫叉插穿垃圾剷。
讀者Lawrence提供圖片