這天(13日)是禮拜假期更是母親節，沙田馬場晨課較淡靜是預期之內。不過，仍有位練馬師相當積極，就是告東尼，一早在烽火台霸定靚位睇馬，用望遠鏡觀看本周三(16日)一眾谷草賽駒出操，只見告仔神情緊張，多少反映今戰他必有出擊馬在其中。
其中將出爭五班1650米的「星光大師」是前馬王「精英大師」同主馬，「星光大師」今早由助手快跳兩段，晨操專家積奇指馬兒走來充滿角逐興趣，步穩力度貫注，馬身甚靚，狀態越戰越勇。
今次「星光大師」最特別係雷神莫雷拉肯騎，話說雷神以往贏過「星光大師」，但已經好耐之前的事，呢位大哥冇沾手此駒已一年幾，今次突然人馬重逢，無非雷神睇中「星光大師」首次降入五班跑，形勢有利之故。的而且確牠前仗仍在四班上名，今次若抽排好位，不難重開勝門。