母親節係咪大過天？對於工作狂林鄭月娥嚟講，應該唔係。兩子之母林鄭噚日朝早先喺四川回港，梳洗過後傍晚又啟程泰國曼谷出席今朝早舉行嘅聯合國ESCAP（亞洲及太平洋經濟社會委員會）會議作主題發言，今日下午就返港，好似都冇乜時間慶祝母親節，但佢噚日都好應節咁喺facebook貼相，po咗大仔同細仔嘅小時候及畢業照，話兒子長大後追求自己嘅夢想，就係做母親嘅最大喜悅！
風塵僕僕嘅佢，周三又出發。政府新聞處公佈林鄭會喺16日同17日訪問大灣區內兩個城市惠州同廣州，其間會同惠州同廣州市以及廣東省領導會面，就日後大灣區發展商討籌備工作，當然唔少得參觀活動，會考察當地創科、科研、教育、醫療等產業同港人聚居嘅社區，瞓身推動港人變身「大灣區人」。
林鄭會喺17日下午返港，離港期間由政務司司長張建宗署理特首職務。