小市民有冤無路訴真係要爆！好似士多老闆輝哥咁，佢喺北角英皇道開檔40年，近日就「飛來橫禍」。事源恒基地產「君豪峰」地盤上星期二（8日）倒石屎時懷疑出錯，啲石屎壓毀咗佢間貨倉磚牆，裏面擺咗值成20萬嘅汽水飲品，成二、三萬包飲品都污糟咗同壓扁咗要報銷，輝哥真係欲哭無淚。
輝哥話當日有地盤管工聲稱會負責整番幅牆，同賠番貨品損失。點知到咗星期五（11日），疑似恒地請嘅公證行職員，走嚟搵輝哥同太太傾點善後，對方竟然話好多飲品只不過係包裝污糟咗，「抹乾淨」應該可以再賣，意思似係唔想賠，激到輝哥紮紮跳。
老闆大字報申冤
「我話梗係唔得啦」，「點可以咁冇道德？啲泥水污糟嘅，如果有菌入咗飲品到，食壞人點算？」輝哥惟有喺士多外用紙皮寫大字報申冤，又質疑地產商及公證行以大欺小，希望可以討回公道。
輝哥呢個貨倉啱啱就係英皇道856道嘅君豪峰地盤隔籬，大廈出年就入伙，𠵱家趕緊工。其實輝哥同太太喺北角開士多咁多年，一直堅持薄利多銷益街坊，好似可樂咁，仲只係賣緊3蚊罐，真係窮人恩物。輝哥話佢成副身家幾乎擺晒喺啲貨度，𠵱家隨時周轉困難。講到呢度，佢太太忍唔住喊咗出嚟。
《蘋果》幫輝哥出頭追問過恒地，發言人話對今次意外覺得好抱歉，仲話搵公證行只係程序上要做記錄，恒地一定會負上責任，包括還原損毀嘅儲物房，同對貨物損失作出十足賠償。不過究竟公證行職員有冇講過「啲飲品包裝抹乾淨就可以賣番」呢句話？發言人就冇正面回應，話唔排除可能係言語上有誤會啫。
