「粵語是否港人的母語」，呢個問題近日喺教育界引起唔少風波。
特首林鄭月娥喺立法會答問大會被邵議員問到母語係乜嘅時候 ，回答：「對唔住，我唔答呢個無聊問題」之後， 引起社會各界熱烈討論粵語地位 。究竟喺今時今日嘅香港，廣東話，甚至廣東歌，仲有冇價值呢？
日前動主播RachelBee請嚟香港大學教授朱耀偉博士接受訪問。朱教授被問到佢嘅母語係乜，「我自己個人睇法就係，廣東話一定係我母語囉 。因為我出世懂性以來 ，最初淨係識講廣東話， 後來先慢慢學英文，再後來學普通話。」毫不猶疑回答咗特首迴避嘅「無聊問題」。
身為港大香港研究課程總監，朱教授除咗捍衛廣東話，亦希望可以將香港文化傳承落去。佢多年嚟致力研究粵語流行文化，尤其粵語流行曲歌詞，更著有近20本相關書籍及其他論文。朱教授喺港大教授嘅其中一個課程「香港粵語流行歌詞概論 」，係港大中文系以外，少數用廣東話授課嘅科目之一。懷住滿腔熱誠分享對粵語流行歌詞嘅研究心得，朱教授話因為廣東歌歌詞用字簡潔傳神，而呢種流行文化對港人嘅身份認同問題亦息息相關。「冇人話畀我哋聽咩係香港人，咁我哋都係喺生活裏面，例如我哋睇嗰啲戲、聽嗰啲歌、睇嗰啲電視劇、着嗰啲衫、食嗰啲茶餐廳食物，咁樣去長大，變成咗身份認同嘅一部份。」
問到朱教授揀一首代表香港嘅廣東歌，佢話佢嗰個年代嘅人可能都會揀《獅子山下》，但同時慨歎，隨住社會變遷，用《獅子山下》嚟代表而家嘅香港精神可能已經不合時宜。事實上，香港回歸之後，唔少學者都擔心廣東話嘅位置會漸漸被普通話取代。朱教授坦言身同感受，「我參加嘅研討會所謂正經嘅場合 、official嘅場合 ，大部份唔係講英文，就講普通話。」唔通他朝有日，會好似朱教授所講，廣東話會淪為heritage language，喺街市買餸講價先聽到？
採訪：RachelBee
攝錄：馮峰、NEO
精選娛聞，喺晒《娛果》
http://fb.com/appledailyent