世盃臨近，竟然越嚟越多令人失望嘅傷兵消息。繼英格蘭嘅阿歷士張伯倫、法國嘅哥斯尼同德國嘅史甸度等打柴後，家陣就連巴西都同樣收到噩耗。呢支五屆世盃冠軍，喺今屆世盃將會缺少膝部受傷嘅正選右閘丹尼爾，可以話打擊十分大。喺上周二代表巴黎聖日耳門（PSG）踢法國足總盃決賽嘅丹尼爾，踢到80分鐘傷出，當時初步診斷係話佢最少要養傷三周，已經知道情況唔太樂觀，經過國家隊隊醫進一步檢查後，巴西足總周五證實丹尼爾係右膝前十字韌帶受傷，肯定要做手術，而休養時間將會由三星期變半年，肯定冇得參加今夏喺俄羅斯舉行嘅世盃。由於丹尼爾都35歲，即係話佢一生人最後嘅世盃夢都已經正式粉碎，仲要佢近年保持好穩定嘅狀態，一啲都冇老態，所以聽落都幾陰公。國家隊教練迪堤下周一先正式定出23人名單，家陣曼城嘅丹尼路雷斯同哥連泰斯嘅法格拿，會係頂替丹尼爾最合適人選。
至於早前同PSG爭足總盃而屈居亞軍嘅利斯靴比亞斯（上圖右）喺上周五嘅法丙煞科戰作客以1:4大敗畀比斯亞斯，賽後就畀兩支球隊喺聯賽榜爬頭，最後只能夠以尾三成績完成今季聯賽，下季要跌落丁組作賽喇，認真陰公！