古巨基一連五場《WE我們世界巡迴演唱會—香港站特別版》前晚喺紅館開鑼，演唱會以夢想、初戀、青葱、另一半及事業分享基仔嘅成長經過。
基仔自爆初戀故事，佢話：「初戀女友係高中同學Shirley，第一次約會喺快餐店，對方好細心幫我篤凍檸水，令我覺得好溫柔體貼同浪漫，自此見到凍檸水都會諗起對方。」基仔又憶起第一次拖女仔手，佢話：「去土瓜灣一間戲院，唔記得咩戲，只記得兩個人膊頭掂膊頭、手㬹掂手㬹，繼而手拖手嘅感覺。專登早一個站落車送個女仔返屋企，我會喺樓下隔住鐵閘望住對方上樓，自己喺樓下等咗15分鐘，以為對方會落嚟畀個Goodbye Kiss，可惜冇，真係幾傻仔。」基仔又會匿喺被窩傾電話，直到對方扯鼻鼾先收線，真係好浪漫，基仔話：「到現在仲收起情信、相全部keep住，老婆應該都知道，但冇睇。」之後就唱出《告別我的戀人們》。
去到「另一半」環節，基仔笑言自己係靚仔歌手，但做咗一件令萬千少女傷心嘅事，就係2014年帶Lorraine去美國結婚。基仔話94年、22歲嘅佢就認識Lorraine，佢話：「當時係唱片公司派佢湊我，冇諗過湊吓湊吓咁就湊埋做兩公婆。」
而結婚念頭源自一次意外，基仔話：「有日我哋去沙田踩單車，見到Lorraine跌落地下成隻手流血，頭盔都裂埋，我陪佢去醫院縫針，覺得佢太論盡，我就諗，真係要每日都睇實佢，自此古太冇再仆親。」基仔笑言現在好似娶咗個周星馳返屋企回家，因對方經常帶畀佢歡樂，佢話：「我哋開餅舖，一入門口，佢話『快啲攞個雪櫃去芝士蛋糕』，佢好鍾意叫我重組句子，所以睇佢幾論盡。」
基仔又爆第一次見到Lorraine係化咗妝，但落妝後都咁靚，佢話：「第一次見到佢着咗露腰嘅冷衫，着冷衫即係凍，但佢又要露腰，可能佢想吸引我，呢啲點滴都記在我心頭。」然後唱出兩人相識嘅第一首歌《愛的解釋》，仲有自己寫嘅《我與你》畀Lorraine，期間Lorraine喺後台出嚟望咗一望，知道被發現後，好快就返入後台。