的士司機「揀客」、鍾意載長途客不時惹起爭議，近日就有網民喺的士司機facebook專頁分享影片（圖），懷疑司機雖然接到長途客反而受騙。條片相信由車頭cam拍攝，一個中年乘客一上車就提議畀1,300蚊人仔司機，要求包車到夜晚11點，車cam顯示乘客大約下晝5點上車。個乘客話因為要去上水火車站接「阿彌陀佛」人士再去紅磡打齋，點知的士行到一半，乘客突然要求加碼200蚊要去沙田上樓攞聖經。
司機唔明為乜要畀人仔，開始有懷疑，提議不如先畀錢，「我想開心吓數吓（錢）先」，但乘客堅持要到上水先畀錢，又話因為「阿彌陀佛」人士喺大陸落嚟，所以會畀人民幣。大約10分鐘車程到咗沙田，乘客亦都落車「上樓攞聖經」，但臨走之前竟然問司機「借散紙」包紅包，司機不虞有詐：「要幾多？」乘客聽落有啲唔耐煩：「幾多……一千萬咩，（等等）畀番人民幣你。」據樓主所講，司機一共過水500蚊畀乘客，而據車cam時間所見司機由5點15分等到5點45分，等咗最少半個鐘，乘客居然一去無回頭，好明顯個乘客一早計劃呃司機車佢去沙田！