爆相爆片：
大銀幕被扑爆　車主：差人叫我查案

村地泊車箒，咩事會得罪人俾人扑車呢？從事裝修工程的鄧先生表示，之前喺西貢斬竹灣接咗單Job，喺嗰度做裝修，為咗方便往返，他揸Audi房車出入，將車泊喺村口空地，「問過村民，話唔阻路唔阻人，冇乜所謂。」泊咗大約半年都相安無事，點知到本周三就出事啦。

泊村地出事

話說鄧先生當日早上如常開車到空地泊車，至傍晚6點幾取車時，見到架車成塊大銀幕爆晒，呈蜘蛛網狀裂紋，於是翻睇車cam還原事發經過，發現有個着短衫褲街坊Look男人從橫巷走出來，不分由說喺草叢執起嚿石頭掟爆大銀幕，之後不知所終。鄧先生稱按疑兇衣着，應該係住附近的村民，但對事件起因一頭霧水，「噚日泊位冇阻路，仲夠一架中型貨車過，之前又冇同人嘈，點解俾人掟石，諗極唔明。」
最令他激氣的是，他立刻報警，差人回應話嗰度係私家路，冇人手長期擺喺度幫手查案，「叫我提供多啲線索，話見到佢一係報警，一係捉住佢再報警，或者靜靜哋跟住佢睇佢入邊間屋。」佢話唔知差人係咪有心做單案。警方則回應案件已列刑事毀壞，正追查逞兇者下落。