上面講嗰條瘋傳的車cam片，《蘋果》搵到上載短片嘅主角、夜間的士司機景叔講返中伏經過，呼籲同行小心防範。
「一手搶錢就走」
景叔話上周四（5月3日）下午近5時喺九龍城遇到嗰位騙徒，說話帶潮州口音、身穿黑色衫褲、戴粗金鏈、說話粗豪，成個大豪客款引司機落叠，他喺衙前圍道截車，稱到上水火車站接人到紅磡殯儀館打齋，開價以1,300元人民幣（約1,600港元）包車6粒鐘，上車行咗幾分鐘後又加碼200元，要求先往沙田取經書。
景叔話，5時15分抵達沙田廣場，騙徒稱到樓上取經書，未支付車資就落車，雖覺得唔妥，唔想得失乘客就無阻止，但騙徒唔夠兩秒返轉頭話借散紙。景叔先拎出10張20元紙幣，但騙徒話唔夠，再拎3張100元鈔票即共500元，「我仲揸住啲錢，佢一手搶咗我啲錢走咗，我叫唔停，解安全帶落車追，但佢已不知所終。」呆等20分鐘後確認上當。
短片引來強烈迴響，不少網民認為行騙手法有破綻，的士司機貪錢先會上當，但景叔話唔係貪財接受包車，惟不欲得罪乘客才答允，他曾無意報警，最終在車主鼓勵下報案，並將騙徒樣貌同錄音放上網，提醒同行小心。巧合與景叔合作駕駛同一架車的日間司機，就係汽車交通運輸業總工會的士司機分會主任杜燊棠，他個多月前喺旺角亞皆老街亦遇過同一騙徒，覺得條件太優厚立即拒絕，呼籲同行便宜莫貪，並希望警方盡快破案。