《BBC》話，前英格蘭國家隊隊長朗尼，已經同美聯嘅華盛頓聯隊基本上傾掂數，今夏加盟。今季返咗去母會愛華頓，31場英超都入咗10球，不過其實佢喺2018年都未入過波，踢嘅位置都好模糊，喺中場唔上唔落咁。上個月默西塞德郡打吡作客利物浦，朗尼被換出時仲發領隊艾拿迪斯老脾，睇嚟踢得唔多開心。32歲嘅朗尼由經理人Paul Stretford同華盛頓聯隊傾掂數，朗尼會簽一份年薪1,250萬鎊（約1.3億港元）嘅兩年合約，講番有成24萬鎊周薪，同佢頂峯時喺曼聯嘅30萬鎊周薪都唔差多，而美職聯嘅轉會窗就會喺7月10號開。
據報朗尼老婆高蓮就好嚮往去美國首都住，同埋唔想去中國，所以朗尼唔會考慮踢中超。而華盛頓聯隊嘅行政總裁Jason Levien，舊年夏天已經接洽過朗尼，不過當時朗尼就一心返拖肥糖。另外，傳聞話華盛頓聯隊野心好大，一月喺尹佩斯返飛燕諾前試過搵佢，亦都對「小豆」查維亞靴南迪斯、泰維斯同巴洛迪利有興趣，睇嚟呢隊波都好鍾意搵同曼徹斯特有關係嘅球員！