英國《BBC》報道，上周六因為腦出血突然要入院接受緊急手術嘅前曼聯領隊費格遜，已經離開深切治療部。報道引述曼聯所發嘅官方聲明指，76歲嘅費格遜將會繼續留喺沙福城皇家醫院（Salford Royal Hospital）養病。聲明同時指，費格遜嘅家人感謝外界對呢位前紅魔鬼主帥嘅支持，但亦要求外界尊重其私隱，唔好作出滋擾，等爵爺可以靜養。
費格遜最後一次公開露面，是上個月喺奧脫福為阿仙奴領隊雲格頒贈紀念獎盃。喺1986年11月成為曼聯領隊嘅費格遜，任內領軍26載，共贏得38項冠軍，呢位蘇格蘭籍主帥喺2013年5月先退休。