親共團體香港各界慶典委員會舊年以慈善團體名義，成功攞快證訂咗維園足球場嘅7.1檔期。今年佢哋食過翻尋味，又再重施故技，搶咗今年7.1維園足球場檔期，又再令到主辦7.1遊行嘅民陣食白果。民陣警權關注組召集人區諾軒話，今年大家可能要喺銅鑼灣東角道起步喇。
舊年慶委會話7.1要喺維園搞創科展覽，而康文署就話民陣遲咗申請，加上慶委會係法例下嘅慈善團體，所以享有優先權獲批場地，結果民陣要用維園草地起步。
今年民陣又再入紙申請，但又俾各界慶典委員會搶咗個場，區諾軒仲話，民陣連維園草地都唔會申請㗎喇。既然建制派要咁玩法，咁佢哋都應該「pay the price（付出代價）」，於是民陣就申請用東角道做遊行起步點囉，仲要係申請1,500人嘅遊行。
民陣召集人葉志衍就解釋，想遊行嘅市民根本唔想入草地等，而且舊年落雨，喺草地等就更唔理想。葉志衍仲話，原本約咗昨日同警方傾，不過警方取消咗個會，惟有等下次。其實個制度一日冇變，慶委會用慈善團體身份同民陣搶，民陣都申請唔到，各界慶典委員會就可以永續用維園嘅。