立法會補選塵埃落定，一眾候選人陸續向選舉事務處遞交選舉開支申報。自稱2016年立法會選舉網絡紅人、參與新界東補選嘅娥姐陳玉娥，就一共只係用咗7,187.6元搞選舉，同其他以一百幾十萬搞選舉嘅候選人，明顯差一大截。
卅皮影沙龍
原來娥姐呢7,187.6元中，佢自己只係出咗1,000蚊多少少咋，因為佢一共收到獲得6筆共1,000蚊嘅現金捐贈，同埋一筆29.1港元嘅現金捐贈，但冇顯示邊個捐呢29.1元，亦唔知點解條數咁零丁，不過將幾條捐款數夾埋，娥姐合共收到6,029.1元嘅選舉捐贈，換言之佢自己出嘅錢真係好少，計計埋埋佢只係付出1,158.5元，只係成筆開支一成半左右，另外八成已經有人埋單，真係不得不配服娥姐嘅吸金力喇。
咁娥姐又點用呢7,187.6元？根據娥姐填寫嘅選舉開支申報，佢用其中5,000幾蚊用作宣傳廣告開支，當中花費最多嘅係宣傳廣告開支，就係用4,500蚊出宣傳單張，另外有1,320元用嚟整橫額。至於其他開支，就包括食飯錢同的士錢等，另外有一項個人開支，原來係佢用咗30大元去影沙龍照。比起其他候選人娥姐真係相對慳家，海報、傳單佢都標記咗係舊物重用，單據顯示全部都係2016年參加立法會換屆選舉時嘅剩餘物資。
李八方