政府成日向建制派輸送利益唔係新聞，但近來越做越離譜、越來越明目張膽，就真係令民主派睇到火滾！好似噚日立法會辯論預算案，區諾軒提出削減創新及科技局1.1億元開支，相當於2018-19年度創科局「創科生活基金」預算。
點解要削呢筆開支？因為入面好多項目標款以百萬計，仲要益晒建制，熱血公民鄭松泰發言時，就拎其中一個設計「八段錦健康遊戲」的手機應用程式做例子，呢個App教長者打八段錦，但竟然申請到450萬元！而申請團體唔係乜創科公司，而係北角區街坊福利事務促進會！咁樣批成450萬益個建制派街坊會，有乜理由民主派議員唔㷫！