【爆相爆片】艾威上年同太太養咗隻歲半大嘅伯恩山犬Sashimi，自此就做咗狗奴，連同太太去旅行過二人世界嘅機會都放棄，因為佢唔捨得將Sashimi放喺寵物酒店寄宿。本報讀者王小姐透過《蘋果》「爆相爆片」表示，日前朝早11點幾，見到艾威帶埋狗狗現身西貢，喺一間餐廳醫肚，由於伯恩山犬體形唔細，唔方便進入餐廳，所以兩公婆揀咗門外嘅座位，邊食嘢邊玩電話，狗狗就乖乖坐喺主人身邊。
食客撩狗玩
王小姐話：「見艾威食緊嘢都同隻狗玩，隻狗好乖。有其他狗經過，佢隻狗起身想衝前，都扯到艾威起埋身，艾威就即刻拉停隻狗。冇耐就見有個女人嚟到，坐埋一齊邊食邊傾，個女人都有撩隻狗玩。」艾威日前接受《蘋果》電話訪問，佢話：「之前網劇、電影叠住一齊開，日以繼夜冇陪佢玩，啱啱拍完晒啲戲，遲啲再幫港台拍單元劇。本來平時唔會喺公眾假期帶佢出街，驚人多唔方便，不過見天氣咁好，所以帶佢出嚟玩吓。」佢仲講笑話狗仔好乖，好似周潤發咁受歡迎：「每次帶佢出街，就好似發哥出巡咁受歡迎，個個爭住撩佢玩。」