巴黎聖日耳門（PSG）正式成為法國本土三冠王，周二喺法足盃決賽憑盧施素同卡雲尼上下半場各入一粒，2:0輕取法丙神奇球隊利斯靴比亞斯。歷史性一幕係PSG班球員賽後邀請敵軍隊長科魯莊一齊走上頒獎台捧盃，但對方就因為輸波，捧盃個樣都捧得唔開心。
PSG呢場波以2:0勝出，足智彩本身開[-3]，絕對係贏得少，但對面嘅丙組仔可以殺入決賽，就真係唔簡單，PSG為表示尊重，請對手隊長上台一齊捧盃，由堤亞高施華將獎座交到對方手中，但對方似乎唔多領情，勉為其難咁舉起個盃幾秒後就鬆手；其實輸波仲要一齊舉盃，都唔知攞景定贈興。有網民就乘機提起成世喺歐聯都得二奶命嘅祖雲達斯門將保方，話如果佢仲有機會入到決賽又輸，對手都應該咁做。養緊傷嘅尼馬亦到現場為球隊打氣，賽後都有同班隊友一齊慶祝捧盃，但嚟到季尾又傳佢想返西甲，皇家馬德里繼續吼到實。