爆相爆片：頭已側　神力女賊俾三猛男㩒低

深水埗鴨寮街5月8號上演一幕3男制服偷手機女賊嘅場面。根據讀者王先生提供嘅片段所見，三個大男人合力將一個黑皮膚女人按喺地上，女人尖叫「it kills me」，又用唔純正嘅廣東話嗌「好痛啊」。
咁大陣仗，吸引唔少人圍觀，王先生見到一位白衫後生仔，坐喺個女人背上，郁都唔郁好冷靜，旁邊一位冇着衫嘅肥哥哥，右膝損咗；地上有女賊甩咗嘅波鞋同假髮。

鴨記偷手機被發現

原來當日下晝兩點幾，女賊走入鴨寮街與桂林街交界一間燈飾舖，趁職員唔發覺偷去對方手機，另一位職員發現即刻追上，白衫休班警同另一黑衫途人仗義出手，齊將女賊制服。王先生形容，女賊好大力，不停掙扎，好彩警察好快到場，王生認為今次事件入面，兩位熱心男皆值得讚揚。
警方發言人證實，收到32歲姓文市民報警話俾人偷手機，警員到場以涉嫌盜竊拘捕持行街紙嘅南亞女賊。