食環執法又同商販衝突喇！事發喺噚日朝，食環去深水埗檢控檔販阻街，其間同一位37歲姓張女檔販有拗撬，結果女檔主竟然爬上食環署街斗車車頂抗議。
「我哋要開飯㗎！」
根據附近舖頭職員李先生拍低嘅片段睇到，嗰位女士情緒激動，指手劃腳疾呼：「收晒我哋啲嘢，人哋要生活㗎！我哋要開飯㗎！」李生見斗車入面，有大批懷疑係屬於女檔主嘅貨物，估計佢因為批貨被沒收而情緒激動。警車、白車喺現場戒備，附近馬路塞死。擾攘咗十幾分鐘，女檔主聽從勸喻返回地面，未有受傷。李先生雖然戥個女檔主驚險，但覺得如果將啲貨擺晒出公眾地方阻街又係唔啱，認為食環署都係做本份，檔主亦應自律。
警方發言人話，噚日朝10點幾，接獲食環人員報案，指8號（前日）已喺基隆街貼通告，會將非法擺賣貨物搬走，但噚日姓張女檔主仍將貨物非法擺放，所以採取行動搬走佢啲貨。