香港人分秒必爭，不過就算幾趕，揸車都應該小心。話說5月6號，新巴車長林先生喺下晝1點幾，駕駛8H線由小西灣去東華東院，當日由於好多人去拜山，巴士逼滿逾70人，馬路亦塞爆，架架車都要慢慢行。
落車爆粗兼反拍巴士
根據林生提供嘅車cam片段睇到，當佢準備轉入環翠道時，有架黑色日產私家車，喺巴士右邊出現，仲闖入影線想打尖，林生冇讓佢行，私家車竟狼死到鏟上路中石壆同輾過路邊花槽，強行揳位成功爬頭，私家車呢幕猶如電影特技嘅場面，嚇到林生即刻急煞車，巴士即時搖骰仔，車上包括老人家都差啲企唔穩，「我即刻問乘客有冇事，佢哋冇事我先放心。」
新巴繼續行咗一小段，林生忍唔住落車同塞緊車嘅私家車司機理論，「我成架車有老有嫩，出事你過唔過意得去？」點知對方唔道歉之餘，仲講粗口鬧林生「黐X線」，仲話自己已經打晒燈，林生唔讓係唔啱，爭持期間，有巴士乘客睇唔過眼，落車影低私家車，對方即時嬲嬲豬，又落車走去影巴士，擺明唔覺自己錯。
林生已經向公司報告事件，亦都即時向乘客致歉，點知乘客反過來安慰佢︰「都唔關你事！」林生將事發經過同片段放上fb，唔少網民都力撐林生，插爆私家車司機係馬路炸彈。
警方發言人指，已接獲相關投訴，港島總區交通調查隊人員會聯絡有關司機跟進調查。新巴發言人呼籲不論係巴士定係其他道路使用者，喺馬路上都要小心謹慎駕駛，嚴格遵守交通法例，互相忍讓，以保障行車安全。