跪地求饒有用咩？讀者陳先生前日下晝4點左右，一家人去旺角荷李活商業中心商場地庫睇衫，諗住行街時見到好多人企喺女裝專賣連鎖店6IXTY 8IGHT外面，好奇望向人群注目處，當場活生生見證一幕「越女跪求差人」的場面。
阿Sir：有咩返差館先講
陳先生話當時個中年女人個樣愁到爆，嚇到面青青，係咁喺度同阿Sir求情，佢話當時聽到個女人用唔係好純正嘅廣東話講咗幾次：「畀次機會我，放過我啦。」可能個女人被阿Sir嚇到好驚青，除咗一味喺度向阿Sir求情，講講吓仲突然跪低，見到呢一幕，佢同在場圍觀人士都嚇一跳，阿Sir都窒一窒畀唔到反應，「隔咗一陣同個女人講，叫佢唔好咁樣，快啲起番身，有咩事返差館先講」。片中仲聽到差人講咗句：「你跪我都冇用㗎！」佢聽講個女人偷衫俾職員發現，當場人贓並獲，職員即刻報警處理。個女賊可能見成堆阿Sir嚟到執正嚟做，仲搵晒同事guard住佢，所以先至跪地求饒。成件事擾攘咗10幾分鐘，最後阿Sir將個女人鎖上手銬，將佢押上警車帶返警署。
《蘋果》向6IXTY 8IGHT了解，涉事嘅6IXTY 8IGHT職員話唔方便回應。警方就話前日下晝3點接到報案，稱有一個43歲持行街紙嘅越南籍女子，涉嫌偷走5件共值500幾蚊嘅衫褲，警方事後將佢拘捕帶署，目前交由旺角CID 1隊跟進。