好多人話特首林鄭月娥「好打得」，有幾打得？林鄭噚日主持行會前見記者，提起嚟緊一周要外訪3次。娥特聽晚上機去四川，同行有政府官員同6位行會成員，仲有參加過汶川大地震各組織嘅代表，到時佢會見埋四川省委書記、前中聯辦主任彭清華。而佢到13號返港，即晚再飛泰國曼谷，出席聯合國亞洲及太平洋經濟社會委員會年度大會，留唔夠兩日，娥特會喺15號返香港，16號再起程去惠州同廣州，見廣東省委書記李希傾大灣區。
臨飛前嘅娥特噚日都特登去會展睇周恩來誕辰120周年紀念展覽。
周恩來展上「自我檢討」
但主辦單位話《蘋果》無獲邀，八方就只能夠睇新聞處發稿，娥特引述國家主席習近平嘅說話大讚周恩來之餘，仲自我檢討，承認讀書嗰陣冇喺學習中認識到周恩來，不過1979年佢參加交流團去北京參觀中國革命歷史博物館，有位大佢少少嘅女仔負責講解周恩來事迹時激動落淚，令娥特深深感動喎。