今次涉嫌偷竊6IXTY 8IGHT衫褲被捕嘅43歲女子，據稱係持行街紙越南人，翻查以往報道，發現越南幫偷衫情況近年相當猖獗，好似舊年3月警方破獲一個活躍西九龍嘅越南偷衫黨，由主腦接order後，安排持行街紙同黨到目標店舖偷竊，並安排贓物放喺加裝錫紙嘅手挽袋內，目的係要避開檢查裝置。前年12月，便裝探員喺太古城H&M分店捉到一個越南拖篋男，喺篋內撿獲8,000蚊贓物，經調查發現他持行街紙留港，唔排除佢係受聘犯罪集團犯案。
其實咁多單盜竊案都同越南人有關，難怪巿民對少數族裔有誤解，有蘋民甚至留言：「越南黨專職偷衫，南亞專搶刧。」融樂會倡議主任彭婉儀話，有唔少巿民會誤會本地生活嘅南亞人都係好食懶做，其實佢哋大部份人都已落地生根，有啲會從商，有啲學歷高至博士生，亦有人做地盤或服務業等基層工作，可以話佢哋都有為香港社會出一分力，只係大家對他們了解不足所致，認為政府應該做多啲族群共融嘅教育宣傳，先可以破除雙方隔膜。