一世人兩姊妹，講錢失感情，搞到要生要死就更加無謂！噚日朝11點幾，陳小姐行經青衣警署對開，見到一個長髮短裙姑娘，坐喺翠怡花園對開一條行人天橋上，當時警員同消防員喺橋上不斷勸佢，但對方仲坐喺欄杆上不時大叫大嗌，雙腳懸空，睇見都覺得牙煙。
陳小姐話，現場來回車路都封鎖晒，唔畀行人走近，所以聽唔到女事主為乜睇唔開。
警方話原來危坐天橋嘅女子係一名45歲姓盧婦人，事緣佢朝早打電話畀41歲妹妹，傾吓做生意嘅嘢，講到錢銀問題就炒大鑊，家姐仲激心到走去天橋危坐話要自殺，擾攘約一個鐘後，消防及警員勸服佢自行返去安全位置，送院檢查。