新民黨主席葉劉淑儀前日主持一地兩檢委員會時霸氣十足，公民黨議員陳淑莊（Tanya）噚日見傳媒時話，由於公民黨、自由黨同新民黨共用立法會8樓，前日佢留意到一個會議室外嘅特別狀況，就係午飯時間過後，有立法會保安長期駐守葉太議辦門口附近位置，Tanya質疑係咪因為有人通報話要有特別保護呢？定係有人覺得自己生命、財產有危險？甚至去到立法會保安係咪會向個別議員，提供個人保鑣式服務？Tanya話對呢個情況真係不能夠理解。
Tanya又話，過去從未見過立法會保安長期駐守上述位置，所以覺得好古怪同唔尋常，話知道前日駐守葉劉門口附近保安輪過更，所以唔係駐守短時間，至少下晝兩點幾至五點幾都有人，佢認為若果有人覺得自己有危險，其實唔應該用立法會保安守門口呢種方法處理，希望知道發生緊乜嘢事嘅人可以坦白。
專人通知扑咪
不過最令Tanya覺得神奇嘅係，佢得悉駐守葉劉議辦門口附近嘅保安人員，唔止做保安工作，仲要睇實喺立法會2樓咪兜有冇其他議員扑咪，冇人嗰陣仲立即通知葉劉去扑咪，呢個「專人服務」令Tanya覺得匪夷所思，難怪佢話想喺下周召開嘅行管會會議了解究竟發生咗乜嘢事喎。
葉劉噚日下午回應八方查詢時就話，自己噚日並無特別要求立法會保安長期駐守其議辦門口，「我諗係佢哋（立法會保安）係驚議會混亂，就搵個人陪我上去，陪我落去咁啫」。
李八方