【石棺藏屍案】
【本報訊】荃灣DAN6大廈石棺藏屍案昨在高院續審。辯方大律師指第三被告張善恒(阿K,圖)在警誡下詳細作供,乃由於警方指其他涉案人串通指證他,教他招供博取做污點證人,游說道:「如果你唔否認呢,可能有奇蹟,誤殺嚟講坐10年就可以重獲自由。」有警員拳打張阻他見律師,並威嚇:「聽講你好好打㗎喎,我都喺特警隊做過,想同我打?」
指落口供前遭警拳打
被告曾祥欣、劉錫豪和張善恒被指於前年3月4日謀殺張萬里後,帶同「小草」何菱瑜潛逃台灣。張的大律師昨指警方得悉小草向台灣警方指證各被告,特意安排她比各被告早一日回港錄口供。總督察謝旦生不同意,稱並非警方安排,據他所知小草沒向台警說過案情。謝指三被告皆向警方作供屬罕見,「有少少驚喜」。
辯方指張接受錄影會面前,警方引導他招供:「乜唔係你捉實死者隻腳,阿豪喺死者上面撳,用雙手令到死者窒息咩﹖你唔使話我知事實係咪咁,我估下㗎啫,件事發生就發生咗,我哋差人係幫到咁多,件事入面嘅角色你最清楚。」警長蔡國基曾言:「你應該知點講啦,後生仔你諗清楚,成世㗎。」警員李振邦則自稱做過特警及拳打張。李和蔡昨均否認。聆訊今續。
案件編號:HCCC459/16
■記者勞東來