話說早排教育局就俾人踢爆，喺2013年向全港小學派發嘅普通話課程配套資料中，用咗大陸學者嘅文章，話香港漢族人母語係漢語，粵語只屬方言，不過早兩日有網民搵到教育局同年製作嘅中國語文科ETV節目，就力撐粵語嘅好處。
網民回帶 麥明詩都share
2013年教育局製作嘅ETV《粵語通古今（粵語和古詩文誦讀）》裏面就講到，粵語音韻接近唐宋音韻，用詞、聲調等都同古代漢語相近，以粵語朗讀古代律詩，符合聲調音韻平仄要求，但用普通話就未必符合，例如「明月幾時有」嘅「幾時」、「問君能有幾多愁」嘅「幾多」等，好多都有千年歷史，出自無數耳熟能詳嘅古詩詞。不過，呢集ETV亦講明現代人書寫係用「全民族規範嘅語言」普通話。
呢條片近日有唔少人喺fb轉載，好似10優港姐麥明詩咁，就share咗呢條片，仲問大家「懷唔懷念睇etv嘅日子？」有網民就話以前嘅ETV好「貼地」，仲話要save低佢以防第時比教育局delete㖭。