評馬人余伯樂來短訊通知，女兒余仲欣將於6月5日晚上（7時15分開場）假沙田大會堂音樂廳登台演出，名為「余仲欣粵曲才藝薈萃」，並邀得名伶阮兆輝、黃偉坤、李秋元、李偉驄、名唱家梁之潔女士助陣。
十多年前曾在一個社交場合遇到余伯樂和他的千金余仲欣，當時仲欣是一個小女孩，幾怕羞，想不到今年可以演奏小提琴、二胡、鋼琴、琵琶等等不同樂器，實在令人驚奇，所謂女大十八變，仲欣係一個經典例子。
余伯樂自己除以評馬為專業之外，有三大嗜好，喜歡唱粵曲，玩橋牌和捉圍棋，老實講，都係三四十年前嘅玩意，依家邊度仲有年青人喜歡圍棋、橋牌、粵曲呢三樣嘢？想當年，左丁山在農圃道新亞打橋牌，成個Canteen都係同學，各佔一方，但賓架Y（以前係銀行見習生Y，今年考到香港銀行學會會士資格，左丁山以為以後佢在名片印上AHKIB銜頭，點知Y哥仔話現在稱謂已改為Certified Banker，於是改叫佢做賓架Y）話佢七年前在中大畢業時，未見過有同學打橋牌，可知21世紀一代香港青年，有咗電競呢一個時興項目，圍棋橋牌邊度仲有人玩吖，粵曲更加係陳年舊物㖭。
點知余伯樂話：「橋牌、圍棋唔時興，確實如此，但對粵曲你就睇錯晒，除咗不少中老年人懷舊喜歡之外，年青一代似乎重新發現新大陸，唱粵曲人口日漸增加，到西九戲曲中心落成後，如八和會館有錢去大力推廣，粵曲粵劇復甦，並非無望！」
余伯樂自己唱粵曲，成日帶埋女兒一齊去，聽得多，余仲欣學唱埋一份，好快就叻過老竇！聽余伯樂講起，余仲欣四歲學鋼琴，加入香港兒童合唱團，七歲拜師（黃綺雯）學粵曲，八歲學胡琴，九歲兼習粵劇基本功，2005至2008連續三屆獲香港校際粵曲比賽冠軍，後往溫哥華讀中學，任學校樂團首席小提琴及合唱團指揮。大學就讀於McGill主修解剖及細胞生物學，返過嚟香港跟新亞校友姚大衞（中大解剖學教授）實習。畢業後同時獲香港教育大學取錄修讀音樂碩士，及佛羅大學醫學院取錄，將來要做音樂人呢還是做醫生？余伯樂問左丁山意見，左丁山就大膽咁講：「你個女咁本事，讀乜都得，從俗就梗係讀醫，但似乎讀音樂更符合仲欣天賦！」果真取捨兩難，仲欣還要認真考慮，今年先在香港演藝學院擔任兼職導師，又加入EJ樂隊做主音歌手，也加入聖約翰座堂合唱團唱英文及拉丁文聖詩。大家想欣賞佢嘅歌藝，上YouTube搜尋余仲欣（Hammer Yu）就有不少短片！