過去不論做電台、電視台主持，抑或帶領遊行示威，畀人口才了得印象嘅人民力量副主席「快必」譚得志，原來三歲定八十，自細滔滔不絕，因而有唔少「難忘」經歷。
快必話就讀瑪利諾神父教會學校小學時，已經被老師喺成績表評為「Talkative（愛說話）」，更因為鍾意講嘢，返學第4日就因為與同學嗌交，被學校要求見家長。雖然事隔多年，今年46歲嘅快必仍記得清楚，神父見家長時話佢比較百厭，但唔係壞人。到咗中學，辯才了得嘅快必參加過唔少辯論同演講比賽，包括即場抽出題目後，先知要講乜嘅「敏才演講比賽」，仲攞過亞軍㖭。
到咗中六，百厭嘅快必則試過因為拍拖缺課，人生第二次被學校要求見家長，佢仲記得當年校長鬧佢唔畀心機讀書，唔使旨意入到大學。一向唔認輸嘅佢，就視校長呢番言論為激勵，最終不但考入港大中文系，更成為當年全校成績最好嘅文科生。
勸師兄黎棟國少做衰嘢
唔講唔知，娥特老公林兆波、保安局前局長黎棟國、「DQ主任」鄧如欣都係讀瑪利諾神父教會學校。快必話由於不滿政府打壓雨傘運動，舊年喺母校校董會選舉遇見黎棟國時，當面同黎棟國講：「師兄，唔好做咁多衰嘢。」激到黎棟國面都黑埋。
快必又話，至今對母校有好深感情，因為遇到兩個好好嘅老師，令佢中學時已立志要做一啲可以對住好多人講嘢、有創意同啟廸民智嘅職業，最終由做電台同電視主持，到現時投身社運，都符合晒呢3個條件，更喺商台應徵時，識咗至今拍住上嘅戰友、人民力量立法會議員「慢必」陳志全。
