今屆政府着力推動基層醫療發展，不過公立醫院每日都服務大批慢性病、長者病人，服務量爆燈，要疏導輪候潮兼再拓展新服務，唔係咁易。醫管局行政總裁梁栢賢就揚言，公院要以新思維嚟搞基層醫療至有出路，更將自己形容為酷似超級英雄「奇異博士」（Doctor Strange）嘅超英「DOCTOR LEUNG」，打救醫管局！
稱要活用大數據
梁栢賢噚日喺醫管局周年研討大會度話，香港有慢性病嘅長者人口持續飆升，去到2036年成247萬長者有慢性病；如果以𠵱家醫管局普通科門診有三分之一病人係長者嚟計，相信廿年之後公院面對嘅壓力就更大。
除咗人口老化，慢性病亦係導致醫管局服務量供不應求嘅原因。梁栢賢話，各個年齡層有慢性病嘅比率都增幅不少，例如2010年至2016年，長者、非長者人口有慢性病嘅比率增幅都係貼近5%。佢認為未來要做好基層醫療，就唔可以一味加服務名額喇，仲需要新思維至得。唔怪得要打造自己成為「奇異博士」。
梁栢賢覺得醫管局可以因應資訊科技發展，活用大數據，並將病人資料同醫管局嘅臨床訊息系統結合，等病人喺屋企都可以用手機掌握病情、覆診資料等等，醫院亦可以更準確分析臨床服務成效。但要推展新服務，一兩年冇可能做得完；梁栢賢就算能力幾咁強，出年都會退休。唔知嚟緊邊個會接力做超級英雄呢﹖
李八方