立法會噚日下晝，同唔同國家駐港總領事午宴，幾十個來自不同國家，包括美國、意大利、日本、秘魯、芬蘭等領事都畀面出席，多名立法會議員亦現身迎賓。
公民黨立法會議員譚文豪飯後話，會上同一個領事交流時，對方主動提到立會正在審議嘅一地兩檢問題，問日後駐香港領事若然有需要，可唔可以進入西九內地口岸區行使領事職能，定要搵番駐大陸嘅領事，先可以去提供領事服務？
譚文豪話，按政府過去講法，西九內地口岸區係大陸範圍，應該要由大陸領事負責，但過去大陸領事嘅權限範圍，並唔包括呢個明顯位於香港嘅額外地方，由於政府至今未交代清楚，所以譚文豪惟有叫個領事快啲去信問問特區政府。
同場同領事食飯嘅會計界議員梁繼昌就話，呢個領事提出問題好合理，話其實唔止領事職權，好多國際公約，以及保險、電訊合約等，將來可能都受到西九一地兩檢嘅安排影響，批評政府現時解釋得唔清唔楚，但就係都要逼立法會極速通過條例喎。