駕駛人士最怕食牛肉乾（交通違例定額罰款），一張盛惠320元，若然一次食足28張，「飽到滯」之餘，近9,000大元罰款更令荷包大出血。有讀者近日發現荃灣和宜合里近可風中學一條隧道，有架封塵黑色豐田私家車，車頭水撥夾咗28張牛肉乾，場面壯觀，呢位正義讀者批評車主無理霸路，希望佢現身揸走架車。
車主年廿七後冇影
《蘋果》到場視察，發現呢28張告票全部今年4月開出，包括多張由4月10至12日發出，幾乎「一日一牛肉乾」，至於私家車有個車胎已經漏氣，如同廢棄車輛。
附近一名露宿者話，封塵豐田自農曆年廿七（2月12日）開始泊喺度，亦不見車主現身，相信被抄嘅牛肉乾唔止呢28張。《蘋果》根據私家車上一張電話紙搵到一名姓黎男子，佢否認係車主，仲話一個月前已獲通知話佢架車被抄牌，佢之後發現自己架車無事懷疑被整蠱。上星期六，再有警員搵佢要他揸車走架車，令佢感到困擾。
據車牌記錄，呢架封塵豐田車主係個姓林男子，《蘋果》去到登記嘅梨木樹邨地址有人應門，佢話林姓男子不是經常出現，但唔知架車長期停泊嘅原因。