隔牆有耳:教買十蚊贏千萬 少年發仔係馬神 - 李八方

隔牆有耳:
教買十蚊贏千萬 少年發仔係馬神 - 李八方

鄉議局盃噚日喺沙田馬場進行,做立法會議員前,已出咗名愛馬嘅「發仔」鄉議局主席劉業強,噚日就同八方分享,個人贏錢贏得最犀利一次,係30幾、40年前,幫契爺買中咗6隻win,令契爺用十蚊投注,就贏咗「8位數字(即達千萬)」返嚟,都咪話唔厲害。發仔話,70、80年代讀緊中學,未成年唔可以賭馬,惟有幫契爺分析賽馬,形容賽馬係當年「最潮」玩意,除咗運動,平日一班同學都經常講馬。
問到買馬有乜心得,發仔就話一日咁多賽事,無可能場場都落注,話如果分析到大熱門好大機會輸,大家不妨買冷門,因為咁樣先會有回報,只跟風買大熱門,就好難贏到錢。
發仔又話,最高峯時可以記晒香港逾千隻馬資料,現時由於做咗立法會議員事忙,所以只記到約200隻。講番鄉議局盃,發仔原本估計2號馬「錶之霸」跑出,可惜隻馬最終三甲不入,但佢一啲都唔介意,話輸咗就當做善事喎。