藍絲「女神」李偲嫣前日同香港專業進修學校副總監「鋮浚哥」謝鋮浚結婚，今次偲嫣再婚，引起好多網民關注，前日已有網民喺討論區貼咗鋮浚哥着白色宮廷禮服、偲嫣露事業線嘅相，好多網民大讚鋮浚哥你真識食之餘，仲祝佢哋一生一世，唔好放番偲嫣出嚟，不過真正勇者唔只做鍵盤戰士咁簡單，有人直擊偲嫣大婚「盛況」，仲全程直擊拍埋片㖭！
《蘋果》讀者Bryon（化名）前日直擊到偲嫣下晝行禮嘅「盛況」，Bryon本身係隔籬場地嘅賓客，但因為兩個場都係露天，中間冇完全隔開，所以就見證到偲嫣變成謝太嘅一刻。Bryon話，偲嫣場婚禮歷時大約半個鐘，但佢因為擔心會俾偲嫣嘅大媽賓客發現，所以冇影足全程。但佢話，偲嫣再婚「都係開心事」，會衷心「祝福佢」最終搵到第二春。
天文台長都畀心心
其實偲嫣對自己今次再婚相當興奮，佢自己喺個人fb賬戶貼嘅谷胸婚紗照，就吸引好多人畀like同心心，連天文台長岑智明都有畀心，讚偲嫣「勁正」呀！偲嫣所以為香港人熟悉，源於佢做正義聯盟主席時勇猛藍絲形象，之前曾經有報道話，佢結婚後或會淡出政壇，不過噚日佢又同傳媒講，今年下半年會先好好享受家庭生活，離開政治遠少少，但唔代表完全離開政圈，如果有需要，佢一樣會喺某啲事情上繼續發聲。
李八方