今季車路士表現大跌watt，由上季英超冠軍到今季只能夠追趕前四位置，雖然英足盃入到決賽，但總體嚟講，領隊干地都唔算交到貨。加上干地又成日同高層喺轉會問題上開火，似乎今季季尾離隊事在必行。
最近就有傳媒報道，話車路士已經鎖定下季領隊人選，將會係今季帶領拿玻里非常出色嘅主帥沙利，仲話車仔會為咗佢，向拿玻里支付差唔多成700萬鎊（約7,000萬港元）嘅贖身費。更過癮嘅係，離任車仔主帥嘅干地被傳可能接替沙利執掌拿玻里，互換東家。
沙利租已斷學英文
早喺上個月，已經有那不勒斯當地傳媒爆出，沙利已經同包租公解除租約，五月底就會搬離喺那不勒斯嘅住所，加上被傳出近期積極學英文，咁多蛛絲馬迹，顯示佢似乎有機會離開意大利，遠走英格蘭。
據指，唔係太滿意沙利太少輪換嘅拿玻里主席迪羅倫迪斯，最近就承認球會基本上無能力左右沙利嘅去留：「一切都要睇佢自己嘅意願；但係現階段唔係太適合去處理呢件事，畢竟仲係聯賽最後衝刺階段。年初開始，我哋傾過幾次，如果佢決定留低，對我哋當然係好事；但如果有其他球會出得起贖身費，我哋都冇能力留人。」
泰利想學謝四教波
如果唔係搵外籍領隊，車仔又會唔會考慮吓搵舊將做領隊呢？事關車仔前隊長泰利，最近見到前國家隊隊友謝拉特下季會去蘇超執教格拉斯哥流浪咁過癮，正讀緊A級教練課程嘅泰利，就講到明自己好恨教波，「我同林柏特、謝拉特呢一代球員，曾經同好多出色嘅領隊合作過，都出戰過好多重要賽事，如果我哋呢啲經驗傳唔到畀下一代球員嘅話，真係一件好可惜嘅事。」雖然泰利今年夏天就拎到牌，但佢就喺阿士東維拉效力緊，連靴都未掛，睇怕要夠資歷教車仔都仲要多幾年。
講番車仔先，喺周日迎戰利物浦嘅大戰之前，中場法比加斯就迎接佢31歲生日，收到由另一半Daniella Semaan送上嘅大蛋糕，上面仲要淋上滿滿嘅榛子醬，真係見到都甜到漏。Daniella更喺自己ig放閃，仲話有法比喺身邊就好似天堂咁，真係甜上加甜。