上星期六立法會政制事務委員會搞《國歌法》立法公聽會，席間鍵盤戰線發言人「滑鼠娘娘」鄺頌晴發言，話尊重國家同國歌真係唔係應有之義，仲反問會唔會尊重一個用坦克車轆人民嘅政權？之後仲講話自己係中國人真係難聽過粗口！呢番話亦辣㷫咗立法會保險界議員陳健波，佢仲特登拍片反駁，不過對年輕人話點尊重一個用坦克車轆過自己人民嘅國家呢，波哥就輕輕帶過。波哥話青年人敵視祖國或涉及教育制度問題，又話係俾媒體洗腦，強調話即使話自己唔係中國人，都改變唔到係中國人嘅事實，不過對年輕人批評中國點樣打壓、甚至殺死人民，波哥以每個國家都會發生唔願意見到嘅事情，又話總不能因為一兩次呢啲事，就唔認自己係國民，仲話只要一日攞住特區護照，你就係中國人。