發展局局長黃偉綸最近拉埋環境局局長黃錦星一齊落水，究竟所謂何事？原來呢兩位局長最近「行孖咇」，坐船去船灣淡水湖，喺水中央檢視浮動太陽能發電裝置。
被指似真人版「大嘥鬼」嘅黃錦星期間無懼被指hehe，突然喺褲袋掹出一隻大嘥鬼公仔送畀黃偉綸，再用自己手上隻滴惜仔公仔，話要同大嘥鬼「錫一啖，加強合作」。
「雙黃」局長視察期間，得悉呢個系統每年發電可達12萬度，即大約一年36戶家庭嘅用電量，都咪話唔嘢少。除咗發電了得，呢個浮動太陽能板亦相當「捱得」，舊年經歷強颱風「天鴿」吹襲後仍絲毫無損，更成為唔少雀仔嘅休憩空間。
有興趣嘅市民只要沿船灣淡水湖堤壩（近大美督入口）行至壩尾，再沿路前走約500米，就可近觀整個船形嘅發電系統。