電腦J在新亞主修人類學，想唔到今天會成為一個獨當一面嘅資訊科技記者，最近受邀請到上海參觀採訪聞名一時嘅獨角獸「商湯科技」，在電話與左丁山傾起，一匹布咁長，左丁山係科學盲，對佢嘅說話，一知半解，只能附和咁講：「當今世界，科技創業蔚然成風，全世界資金爭住搵獨角獸，電腦J你識咁多科技人，有無辦法組合一家初創嚟玩吓？」
電腦J話：「人到中年，冇膽咯，如果你要知道多啲創業，不妨參加中大創業日，聽吓商湯科技聯合創始人徐立演講，嗱，係徐立呀，唔係新亞校友徐立之呀！」當然知道分別啦。跟住收到中大校友事務處電郵，通知5月11至12日，一連兩日，在中大康本國際學術園（大學站對面）舉辦中大創業日，由香港中文大學校友承傳基金（CUHK Alumni Torch Fund）主辦，每日由上午10時至下午5時，設有創業展覽、講座、創業大賽等活動，目的在展示中大校友的最新創業成果及希望在校園向學生推廣創業文化，今年已經係第四屆，隨着香港創業氣氛轉旺，愈來愈多校友參加呢項活動。
5月11日早上開幕典禮之後，就有名人演講，由段崇智校長打頭炮，講：「生物醫學科技在香港的發展」，跟住就係徐立（中大博士，2000）校友講：「AI發展：未來已來，隱約可見。」司儀係方健儀校友。
兩位科技明星級人馬演講，有莫大吸引力，香港科技記者（唉，不過究竟有幾多個呢！）唔到場聽講就笨，徐立嘅商湯科技創立於2014年，合作夥伴主要係中文大學之「多媒體實驗室」之教授及博士生師兄弟，在湯曉鷗教授帶領下該實驗室已成為「深度學習視覺」領域之世界重點實驗室。商湯成立後短短幾年間，在臉譜識別、圖像識別、自動駕駛、人機交互、人工智能方面創下領先技術。商湯現在估值起碼45億美元，2017年僱用700人，是中大校友成功創業的最佳範例。段校長、徐立博士演講之後，有亮點資本合夥人勞維信校友及其他知名財經界校友，如關百豪、龐寶林、林達華教授（中大商湯科技聯合實驗室主任），李英豪（錢方好近創辦人及CEO），Google Cloud北亞雲平台總監李孔源等等講述科技與創業實例，有興趣人士可登上中大校友網查閱詳情（alumni.cuhk.edu.hk）。