旺角荷李活購物中心近日出現一對駝背側頭雌雄賊，日前兩人在商場氹氹轉搜尋獵物，最後一間男裝店舖中招，兩賊10秒內偷去陳列店外貨架上一條價值$998嘅長褲，然後熟練放入隨身黑色大袋後，施施然離去。
男出手 女把風
《蘋果》搵到店舖負責人Daniel，佢話單偷竊案發生於上星期三，根據閉路電視片段，雌雄賊衣着普通，反而佢哋外表奇特，男嘅頭部略為傾側，女嘅明顯駝背，二人於商場內狹窄走廊扮作挑選衣物，其後男賊迅速靠近店門貨架，取走一條長褲，並熟手地將長褲捲起再塞入隨身嘅黑色揹袋，手法純熟，全程不足10秒，至於駝背長髮女則在旁把風。
Daniel話，事發晚上10時15分，商場內不少店舖已關門，人流稀少，10點半當他收舖時點貨至發現貨架上有條價值998元長褲不翼而飛，剩低個衣架，立刻搵保安求助。保安翻查閉路電視，就發現雌雄賊偷嘢呢一幕。Daniel之後同其他店舖收風，行家話當日中午都有見到呢對雌雄賊到嚟踩線，兩人喺商場鬼鬼祟祟咁兜咗幾圈，亦有店主話見過個駝背女由樓上單位落嚟。佢已經報案，希望阿Sir快啲拉到人。
開店廿年，Daniel話過去曾10次遇竊，不過損失唔算多，認為商場保安OK。但經過今次事件，會考慮喺店內安裝閉路電視，同時提示店員提高警覺。
警方回應指，5月5日接獲一名46歲姓黃男子報案，指店舖遇竊，警員到場翻查閉路電視，發現兩名中國籍男女涉嫌於店內偷竊，列店舖盜竊處理，由旺角CID第1隊跟進，暫時未有人被捕。