有位講刨冬瓜嘅「學者」宋欣橋幾年前寫咗篇甩皮甩骨嘅文，居然得教育局青睞，貼去網站，話畀香港老師參考。點甩皮甩骨法？我話你知。
宋欣橋引用大陸學者李宇明嘅〈論母語〉，話「早在1951年聯合國教科文組織就把『母語』稱為『本族語』」，又話「母語就是民族語」。查吓李宇明嘅論文，我發現李宇明嘅參考文獻有篇〈本地語在教育中的應用：聯合國教科文組織1951年專家會議報告〉，再查返原文（收錄於The Use of Vernacular Languages in Education, UNESCO, 1953），喂，唔對路喎，原來UNESCO專家為咗避免誤會，一開波就定義晒所有關鍵詞，包括「母語」、「本地語」，但我睇極都唔見專家將「母語」稱為「本族語」，人哋係咁寫：「Mother or native tongue. The language which a person acquires in early years and which normally becomes his natural instrument of thought and communication.」Oh I see，原來李宇明同宋欣橋覺得native tongue應該譯「本族語」，咁native speaker係咪叫「本族講者」？好心你咪咁黐線啦，mother tongue同native tongue通常指同一樣嘢，而UNESCO就係驚你以為係兩樣嘢，先白紙黑字寫埋個定義出嚟，你仲夠膽死借題發揮？如果要講「現代規範的漢民族共同語」，即普通話，UNESCO同一篇文已經寫明，係叫「國語」：「National language. The language of a political, social and cultural entity.」
宋欣橋呢篇文嘅硬傷，係亂用兼誤讀UNESCO嘅報告，企圖扭曲大眾對「母語」嘅理解。點解教育局要貼篇咁唔嚴謹嘅文呢？司馬昭之心，分明係想偷換概念，將「母語教學」慢慢變「國語教學」。教育局長楊潤雄前幾日講：「如果你今日問我母語係乜嘢，我都會直接答你係粵語。」呵呵，「今日」問就答「粵語」，咁聽日呢？
撐粵語，有兩件事必做。第一，香港人溝通嘅主流語言，係粵語，我哋唔需要特別遷就大陸嚟嘅人，轉用普通話；同理，我去北京亦唔期待當地人用粵語招呼我。最好嘅防守係進攻，大家應該多啲同唔識粵語嘅「新香港人」講粵語，教佢背周星馳對白，唱廣東歌，令到越多人嚟香港，就越多人講粵語。
第二，撐粵語一定要有正確理由。惠州政協委員陳小春，曾經喺微博貼過長文，呼籲「保衛廣東話」，理由係唐詩宋詞「大多數是用現今的所謂粵語寫成」，仲舉咗好多例，比如李白詩「人生得意需盡歡，莫使金樽空對月」嘅「樽」字，話係粵語，普通話係用「瓶」，咁樣證明粵語比普通話更古雅。其實同宋欣橋嘅講法一樣荒謬！如果我引句《詩經》「缾之罄矣，維罍之恥」，話畀你聽「缾」即係「瓶」，我普通話大你千幾年，咁你點算？「粵語古雅論」係trap嚟㗎，用呢種理由保衛粵語，即係攞個紙紮盾牌上戰場，肯定陣亡。咁用咩理由好呢？答案係兩個字：母語。
「母語」一詞源自外語，大概始於中世紀。根據但丁《論俗言》（De Vulgari Eloquentia），「母語」即係拉丁文「materna locutio」，定義同依家大眾嘅理解一樣，指你細細個模仿他人而自然學識嘅語言，有別於另一種要刻意學文法嘅「雅言」（gramatica，當時專指拉丁文），而「母語」又叫「俗言」（vulgaris locutio）。點解大家要撐粵語呢？可以參考吓但丁嘅講法，佢話「（雅、俗）兩種話之間，俗言更加高貴」（Harum quoque duarum nobilior est vulgaris ），因為母語係人類用嘅第一種語言，比所謂規範語更自然更親切。如果你母語係粵語，佢自然就比其他語言高貴，所以守護粵語，首先要確保「母語」定義冇畀「學者」歪曲。「粵語係母語」，要保護，就好似愛護親人，呢個就係最強勁嘅理由，所以教育局先企圖重新定義「母語」，搶走你最大威力武器。講「唐詩宋詞用粵語寫」，係虛假而不堪一擊嘅理論，大家小心。