土瓜灣街坊郭小姐噚日朝早嚇餐飽，佢話落街返工就見到幾架消防車升起雲梯，向區內地標煤氣鼓不停射水，消防員攞住喉轆走嚟走去好鬼緊張，仲以為漏煤氣，但奇在聞唔到煤氣味，《蘋果》第一時間去到發現原來係消防演習，但好多街坊都唔知有演習，飽食驚風散。
郭小姐係馬頭角道街坊，區內地標煤氣鼓日見夜見，佢話當時好多街坊都好擔心，有人吸煙都俾人阻止：「你仲點煙？一陣間爆炸啊！」
記者到場見至少3架消防車升雲梯向煤氣鼓射水，仲有好多架警車同消防車戒備，消防員攞住救火喉走嚟走去，十足荷李活災難片場面，睇真啲原來牆身掛咗「消防演習」標語。
郭小姐得知係演習好唔滿意，認為「應該通知居民」，煤氣公司就話上址原有三個煤氣鼓現時剩番一個，演習一年兩次，每次都會掛橫額，仲通知咗機電署同民政事務處。