唔同年代的人都有唔同年代的偶像和喜愛的歌曲，不過唔好以為「老餅」就一定唔「in」。近日網上音樂串流平台KKBOX就做了一個有趣統計，跟據它們的點播率，分析各年齡層用戶使用習慣和音樂偏好。竟然發現70後或之前出生的「老餅」用戶，其中一個最愛聽的歌手竟然係人稱「阿Flirt」的鄭俊弘！懶理他形象有幾差，主唱多首電視劇主題曲一樣令佢入晒屋，成為「老餅」最愛，其中《一個人的永恆》、《風沙》及《地盡頭》都成為70後最愛歌曲，認真估佢唔到。當然喇，老餅界長青的譚詠麟、張國榮及黎明等巨星亦有上榜。
而叫後後生少少，其實都踏入「老餅」行列的80後，最愛聽的原來是張敬軒、謝霆鋒、五月天及林俊傑。而90後就最愛周柏豪、陳柏宇、Supper Moment及韓國男女團Twice及BTS等。所以話，其實聽張敬軒都已經算係老一輩喇陰公，想扮後生都係聽多啲韓仔韓妹喇。不過其實都有啲歌手係老中青都通殺嘅，或者你都估到，就係神級的陳奕迅、容祖兒及周杰倫，他們三個在各年齡層中都係絕對的熱門歌手。
歌曲方面，Dear Jane《哪裡只得我同你》、JW《矛盾一生》及五月天《後來的我們》都是80後最愛；而90後的最愛則是Tonick《長相廝守》、Supper Moment《風箏》、Chainsmokers《Closer》及Charlie Puth《We Don’t Talk Anymore》，可見年輕用戶比較多聽不同語言的音樂；而田馥甄Hebe的《小幸運》就成為各年齡層中最受歡迎的歌曲。
最後比較有趣的是在收聽時間上，80和90後都多集中在早晚時間，即係返工放工時間喇，而90和00後就更多在深夜時聽歌，唔知係咪同鍾意開夜車做功課溫書有關呢？另外統計亦發現，它們的70後的用戶人數都近來逐漸增長，年紀最大甚至有60歲以上用戶，可見智能手機的普及也令越來越多「老餅」們開始用app聽歌。
記者：韓繼聰
全新旅遊專頁，即like籽想旅行： https://fb.com/travel.appleseed