爆相爆片：鴨記開火　白衫男遭煙灰缸「車」爆缸

「我去鴨寮街打算買數據卡，出咗港鐵站就聽到嘈吵聲，見到兩個男人打埋一齊，仲有人攞煙灰缸打落去，個白衫男就爆缸流血！」下星期去歐洲旅行嘅梁太，前日8點幾同老公去深水埗鴨寮街買SIM卡，點知就遇到一單打交事件。

梁太話，個白衫男頭臉受傷，「啲血仲染落恤衫度，紅色一撻撻，好似傷得好重」。佢話聽到街坊講白衫男係其中一間舖頭老闆，當時同隔籬着綠色衫同染金髮嘅中年男女爭執。揸住塑膠盾牌警察到場分隔雙方，梁太就因為趕時間就走咗冇睇到結局。警方話前日8點鴨寮街發生打交案，懷疑涉及店舖擺位問題，拉咗兩間店舖各一男一女負責人。