張家輝自導自演的電影《低壓槽》前晚在九龍灣展貿舉行首映，陳慧琳（Kelly）、張可頤及苗僑偉等到場外，正忙於世界巡迴演唱會的張學友，亦特別現身撐場。
「渣渣輝冇貶意」
家輝跟學友一同受訪，對於家輝近日被稱為「渣渣輝」，被外界取笑他的普通話不靈光，家輝笑說：「我唔介意嘅，呢個朵好行喎！我睇過微博，知道個朵冇貶意，都好親切同好玩，我唔鼓吹，但大家叫得開心嘅話，我亦都阻止唔到。學友都笑過我好多次啦。」家輝自言普通話沒有進步空間，因為內地華語片都有一套標準口音，所以就算操流利普通話，香港藝人都要用配音。
學友表示看過《低》片預告：「覺得家輝有進步，喺鏡頭運用、意識形態都有自己嘅風格，比起小弟有份參演嗰套《陀地驅魔人》成熟咗好多。」家輝表示二人合作，要視乎學友的時間，不是沒可能，反而太太關詠荷要照顧家庭，合作機會微乎其微。
「撞到先會問佢」
另外，Kelly以透視裝晒長腿到場，被問到好友黎明榮升爸爸，她說：「冇睇過BB啲相，唔會咁八卦，心係想睇但唔會特登問佢拎嚟睇，有機會撞到先會問佢，BB一定係可愛㗎喇。」又忠告黎明要有心理準備BB曝光，她說：「其實小朋友遲早都要返學，你保護得佢幾多吖，所以自己要調節心理，有一日就會接受到，好似我𠵱家兩個仔返學咁，就算冇記者都會有家長去影，放落啲社交平台嗰度傳媒又會拎嚟登，所以自己一定要調適，唔好唔開心。」
採訪：黃曉妍
攝影：仇志德