麗閣邨出現「小李飛刀」之後，邨民人心惶惶，好擔心「唔知下次掟乜」，居民話喺警察未拉到人，房署未裝天眼嘅情況下，惟有選擇自救，方法就喺同掟刀現場「保持距離」，避得就避，所以近日每幢樓嘅簷篷底都多咗人行。推住BB車嘅王小姐坦言：「高空擲物好難迴避……因其他地方都可能遇到高空墮物……但我會小心啲，例如同BB搵啲有蓋嘅地方行。」
另一位帶住小朋友嘅王小姐亦都話「會小心啲」，因為佢以前聽人講過可能因幼稚園家長及小朋友嘈得滯，所以可能樓上有住客不滿聲浪過大而高空擲物發洩，但佢話「掟菜刀」實在太危險。居民劉先生就話：「公共屋邨有高空擲物並非罕見……我平時已經同呢啲大廈保持距離……
𠵱家更加唔會行咁近！」