高空擲物乞人憎，連菜刀都掟埋落街就真係令人忍無可忍。近日深水埗麗閣邨就有把鋒利菜刀（圖）從天而降，跌正喺幼稚園出面，當時幼稚園剛剛放學，好彩把刀冇掟中人，但就搞到全邨人心惶惶。街坊話條邨經常發生擲物事件，最不滿事發當日警方冇上樓仔細調查，希望房署盡快安裝天眼，緝捕「小李飛刀」。
街坊：常有人擲屎尿垃圾
呢單驚險事故喺本周一中午12點幾發生，街坊Ada話當時接小朋友放學行經麗蘿樓地下中華基督教會基真幼稚園門口，呢度附近有鞦韆架等兒童遊樂設施。「突然聽到巨響，之後見到地面有把菜刀，好驚險」，她驚完即刻用手機拍片，數分鐘保安員好快到場執走把菜刀。
另一名街坊李小姐就話之後有警員嚟查，但態度馬虎，「警察有上樓巡邏，但話冇見到可疑人，當時我曾建議警方逐戶拍門調查，但有警員話咁做『好擾民』，唔肯咁做」。佢話當時警員好快就收隊，令佢十分不滿，於是打畀《蘋果》投訴。
《蘋果》去番麗閣邨，發現今次掟刀情況好嚴重，因為附近就係幼稚園，隨時有小朋友同街坊中招，後果不堪設想，街坊仲話近年條邨不時有人高空擲物，包括垃圾同屎尿，但「高空擲刀」就第一次。
前日基真幼稚園仲向全校師生家長發通告，提醒曾經發生飛刀事故，勸家長子女上學放學時小心，盡早返屋企，唔好喺公園逗留。街坊亦覺得警方調查唔落力，惟有寄望房署盡快加裝「天眼」監控，加強阻嚇力。不過前日警方突然重返現場再調查，今次警員搵番把刀仲帶走做證物，更將案件由原先嘅「雜項事件」改為「高空擲物」。
