財委會主席陳健波罕有地有民主派議員拍枱支持，但同樣做主席、有「大主席」之稱嘅立會主席梁君彥就冇咁好彩，仲因為問題長短同民主派議員炒大鑊！話說民主黨尹兆堅喺特首答問大會問娥特土地問題，但因為跟進問題太長，俾梁君彥打斷，話只可以簡單跟進，尹兆堅駁嘴叫梁君彥咪閘住佢問嘢。
點知呢下辣㷫梁君彥，話尹兆堅已問完問題，叫佢立即坐低，但尹兆堅都唔係省油的燈，鬧梁君彥幫政府幫到出面。呢個時候梁君彥就動氣，大大聲話佢唔係幫到出面，而係跟規矩做，正當大家以為梁君彥又想趕尹兆堅走，尹突然話娥特想答佢條問題喎！梁君彥自然畀面娥特，聽到後就收番火，叫尹快趣問問題，一場風波就咁平息。