今時今日，大家有咩奇難雜症，只要問吓Google大神就乜都解決到，而舊時嘅人就冇咁方便，主要係靠從書本搵到答案。咁係咩書呢？其中一本相信係唔少人都聽過嘅《大英百科全書》。原來立法會圖書館從2011年開始就訂購咗《大英百科全書》嘅網上版，為免啲議員、議助同埋秘書處職員唔識用，立法會準備搞個工作坊教吓佢哋。
《大英百科全書》嘅網上版有超過12萬篇文章，真係唔講得笑。所謂識得用其實好好用，有個咁龐大嘅資料庫，若然係唔識用都係徒然，只會令資料庫變成失匙夾萬。可能有見及此，秘書處專登為議員同埋佢哋嘅助理搞呢個工作坊，專門係教吓佢哋點樣用呢個資料庫。可惜吖，呢個資料庫似乎只限議員、議助同埋秘書處職員，記者就冇份，否則八方都有興趣去學吓。