民主派議員區諾軒噚日朝早就預算案發言時，大談自己當年高考讀通識科嘅心得，仲借機拎自己讀通識科學到嘅中共歷史，寸爆當年被人話唔熟中共國情嘅元秋！
區諾軒透露當年自己都讀過通識科，雖然唔係三三四學制，而係高級程度會考，但當年佢喺呢科嘅中國科目攞A，分數仲高過攞B嘅香港科目，而通識科令佢學識好多中國國情，令佢知道乜嘢叫三個代表、四個堅持，仲知道中國五星紅旗嗰四粒細星，分別代表工人、農民、小資產同民族資產階級，「咁咪唔會出現蔣麗芸議員講士農工商囉！」寸爆當年連五星紅旗代表乜都講錯嘅元秋。
區軒跟住仲大講「自決」，批評政府用假「校本自決」，逼校長同老師喺政府推出爭議性教育工程時，做政府擋箭牌，寸爆政府「成日呢個自決唔得、嗰個自決唔得，但校本自決就得」，批評政府透過「假自決」逼學校要聽政府話，先會攞到足夠資源辦學，「呢個叫做勒索，叫做威逼利誘」。