曼城已經提早贏咗英超，盃賽又出晒局，所以𠵱家班球員已經等緊踢世盃，今個周中曼城冇波踢有假放，巴西籍門將艾達臣摩拉斯就同佢個懷孕中嘅老婆Lais，加埋佢個囡囡，就去咗摩納哥坐遊艇出海曬吓太陽，順手晒埋恩愛；而葡萄牙國腳貝拿度施華，同樣都係去咗摩納哥，仲同佢女友Alicia Verrando去間靚餐廳食好西，雖然施華只係着件白tee普普通通，不過Alicia都着番件低胸裝，相當養眼！不過，唔係所有曼城球員都急於離開曼市去玩，中堅奧達文迪就選擇留喺曼市屋企攤唞吓，呢位阿根廷國腳仲整番張自拍擺上ig，用葡文tag埋星期三、下午、曼徹斯特咁，算係經過一整季之後休息吓咁囉。放完假後，曼城剩番嘅聯賽，就只係會對哈特斯菲爾德、白禮頓同修咸頓三支護級隊，睇吓保唔保持到個霸氣啦！
